كتب الناشط جان كلود حمصي من باريس: لما بشوف الصور و الفيديوهات لبيروت ست الدنيا... بيروت مدينة الحرف ... بشوف البلدات و الضيّع و العادات القديمة... بشوف التلج و البحر ... بشوف الشلالات و الينابيع ... بشوف تاريخو و طقسو و طبيعتو ... بشوف الصور القديمة بالزمن الجميل ... لبنان وطن سمّوا سويسرا الشرق... و بزعل كيف صار و تغيّر... كيف حرقني و دمرني و هجرنا أدمغتو... بشوف كيف كان لبنان يقصدوا ليتحكموا ... كانوا يقصدوا ليتعلموا ... يقصدوا ليصيّفوا و يقضّوا الفرص ... كانوا يتخانقوا ليجوا لعنا ... كان لبنان عاصمة الثقافة بالعالم... لبنان عضو مؤسس في الأمم المتحدة... لبنان كتب قانون حقوق الإنسان ... لبنان كان ملتقى الحضارات... لبنان ١٨ طايفة علّمنا العالم كيف بكون العيش المشترك... مش عم بقدر إتقبل فكرة كيف وطن ولادو بدمّروا ... لبنان كان حلم حياتنا ... جدودنا عاشوا العصور الذهبية ... و نحنا عشنا الحرب و الذل و التعتير من وقت ما فقنا و وعينا على هالدني ... كانوا يحلموا يعيشوا بلبنان... صارت بيروت مدينة الظلام و العتمة ... صرنا بلا غاز وكهربا و بنزين و دوا و مستشفى... عايشين من القلة ... عايشين بسجن كبير محبوسين عم يقتلونا نحنا و عايشين... صار وطن الجوع و الفقر و البؤس ... رغم كل شي و كل القهر راح نضلّ نكافح من جوا و من برا مش راح نتركك... ما في إحتلال إلاّ ما إندحر و فلّ مذلول ... دايماً الأمل موجود و الشعب إلاّ ما يوعى ... ما في شعب ما بيوعى ...يمكن يتأخر بس بالنهاية راح يفيق من هالنوم العميق و يرجع يحلّق متل طائر الفينيق ... بعتذر منك يا وطني نحنا ما منستاهلك بس مش راح نتركك ... 🇱🇧✌️💪🙏
