غادة عيد تروي "خبرية الحاج شومان والبقرات والمجاعة"
شارك هذا الخبر
Monday, January 20, 2020
كتبت الإعلامية غادة عيد: خبرية الحاج شومان والبقرات والمجاعة.
رح خبرو لوزير الزراعة وكل الوزرا والنواب والمسؤولين اللي عم يوقفو بوج الشعب بعد ما سرقو ونهبو وفلّسوا البلد خبرية الحاج شومان .
الحاج شومان اتصل فيي عم يشكي بطريقة فوق العادة هالمرة..وعم يبكي على البقرات. شو القصة؟ خبرني قال:
يا اللللللله....المزارعين بالبقاع عم بيدبحوا البقرة الحلوب ويبيعوا لحمها.
كيف وليش؟
صارت البقرة مع فرق العملة بتاكل ب ٣٥ الف ليرة بالنهار..وبتعطي حليب بين ٢٠ و٢٤ كيلو يعني ٢٤ الف... بس كان الدولار ب ١٥٠٠ كانت البقرة عم تربحنا ٥٠٠٠ ليرة كل يوم ..شوفي وين صارت حالتنا. واضاف : يوميا عنا ١١ الف ليرة خسارة بكل بقرة..والمزارع مش عم يقدر يطعمي ولادو كيف بدو يطعمي البقرات.
سألتو للحاج شومان: ليش بدكن دولار حتى تطعمو البقرات. قال : لانو العلف بيجي من برا
ليش ما بتزرعو شعير ودرة ؟ لانو ما حدا بيهتم فينا وبساعدنا وبيوجهنا وبيحمي المزروعات عم تسألي وكأنك ما بتعرفي مزارعين البقاع قديش قبل الثورة كانو عم يشكو ويبكو من فلتان الحدود ودخول البضاعة والمنتجات السورية ..حتى الحليب المهرب قديش حكينا عنو كيف عم بيفوت من سوريا بلا تبريد ويتعرض للتلوث ومعامل الاجبان والالبان بالبقاع بتشتري منو. وربك عليم شو بيطعموا الناس..وطلعنا كم حلقة ببرنامجك" بدا ثورة" نصرخ ونحكي وما حدا بيسمع.
شو بدي اسأل الحاج شومان ...بلا ما اسألو تابع الحكي. قال: قادمين ع مجاعة بعكار والبقاع ...الناس اللي بتزرع مش قادرة تزرع بشباط .ما معها دولار تشتري بذور الزرع. وفكرت بلا ما احكي المجاعة... وين كان رح تضرب كل الناس . اذا ما زرعوا المزارعين من وين منجيب الخضرا. واذا ما اكلوا البقرات من وين منجيب الحليب. خبرية الحاج شومان ...بتختصر وجعنا وازمتنا ...بتختصر اطماع المسؤولين المسعورين المفجوعين...اللي ما بيفكروا بالخضرا والبقرات والانتاج .اتكلوا على فوايد المصارف وارباحن السريعة وعلى القرارات المعلبة والمأكولات المستوردة والاوامر الواردة من برا...وسرقوا اموال الوطن واموال المودعين وهربوها لبرا. واللي بيجي من برا بيرجع لبرا.
ويل لأمة لا تأكل بقراتها من علف أرضها
وبعد في حدا بيسأل ليش الحاج شومان ابن الارض المقاومة ببعلبك الهرمل من جماعة الثورة.
