الاعلامية لارا نون: "صار الوقت إحكي الإشيا متل ما هيي"
شارك هذا الخبر
Tuesday, December 10, 2019
من بعد ٣ ايام مراقبة لموضوع "رسالة حياة" mission de vie... صار وقت إحكي الإشيا متل ما هيي بالعربي المشبرح:
١- في ما يخص التحرش الجنسي، انا معكن ويمكن صار تحرش وفي أدلة. بس بشرفكن إنو معقول من بين عشرات الأطفال يلي مرقوا مع هالجماعة على مدى سنين، وَلا طفل يتعرض للتحرش؟
●إنتي يا مدام يلّي كتير منتبهة على عيلتك وولادك... معقول ما انتبهتي إنو بنتِك تعرضت للتحرش من حدا بعيلتِك؟ ●إنت يا مخضرم معقول ما انتبهت إنو ابنك بالمدرسة العريقة يلي حاطو فيها عم يتعرض للتحرش؟ وأنا بدوري عشت ١١ سنة بمدرسة داخلية، وما بتخلى، وما في بيت بيخلى وكلنا معرضين... بس ولا مرة حملنا الموضوع ورحنا نتاجر فيه بالإعلام... الفاعل لازم يتعاقب ويتعذب وينعمل فيه كل اللازم وينفصل وينحرم... بس ليه الحرب عالبيوت؟ ليه الحرب عالجماعة؟ ليه انتهاك حرمة الأديرة؟
٢- موضوع الافلام الإباحية وبيع الاطفال هون اسمحولي فيها... إذا المعلوف معلوف جوع... مش يعني بالعلف الإعلامي بدكن تزرعولي شي بعيد عن المنطق. ليه؟ لأنو أنا دايما بتردد عالدير وباخد ولادي يلعبو مع ولادن... ما بعرف قدّيه tom and jerry إباحي؟ وصديقتي انا ساعدتا تتبنى بنت من عندن، وصدقوني وبالأدلة والبراهين صديقتي ما معها ٥ آلاف دولار مش عشرة او ١٥ لتدفع حق ولد فيهن... معا بس كرامة ومؤهلات تخليها تتبنى الطفلة...
٣- على ما يبدو هالأشخاص يلي رفضت جماعة رسالة حياة تعطيهن ولد للتبني هني غير مؤهلين للتبني... بس مؤهلين للشر والحقد وإيدن طايلة... وفي ما يخص عناوين الصحف والبرامج المعلوفة وَسَخ... بحب إبعت رسالة مباشرة إلن: "مال الحرام... بينحط عالصحة..." "مال الحرام وخربان البيوت... رح تحطو عبيوتكن وأشغالكن يلي رح تنطفي بليلة ما فيها ضو قمر... ومسيرتكن الإعلامية خير دليل"
٤- موضوع الأكل المنتهية صلاحيتو.. معكن حق أنا من الاشخاص يلي كان يدقلي مدير السوبرماركت "لارا عندي كراتين معكرونة بعد ٣ اسابيع بتخلص مدتها تعي خديهن"... وروح آخدن للجماعة ولغير جمعيات ونضل ناكل منن لآخر يوم صلاحية وبعد ما متت!
٥- ما بستغرب حرب القضاء... وحرب الإعلام... لأنها قائمة عالدولارات... وانا شخصياً احترمت فكر لوثر عبر التاريخ يلّي ثار عالكنيسة وأسس البروتستانت لسبب واحد... كانت ثورة فكر بالرغم من التطرف العقائدي فيها... أما إنتو بعاد عن الفكر سنين ضوئية...
٥- هيدي جماعة أنا عشت معها وقت طويل ومتل ما عم شوف في نسبة كبيرة من الشباب والصبايا عم بيلاقوا دعوِتن فيها أكتر من غير رهبنات وهيدا أكيد موضوع قابل كتير للحرب... خصوصاً بزمن صارت فيه دعوات الرهبنة قليلة كتير... وإنتو يلي عم تحكو عن التحرش... إنتو رموز للعهر الإعلامي مش للتحرش بس... وإنتو يلي عم تحكو عن بيع الأطفال... إنتو رموز لبيع أعضاء الرأي العام... دماغن تحديداً... لولا نذالتكن وشياطينكن ما كنا تعلقنا برسالتنا هلقد... شكراً من القلب!
