لأنو هيدا الشي بيحولك من موقع القوة لموقع الضعف، هيدي سلطة عندها خبرة وأدوات وناس وحلفاء اقليميين، قادرة تبتزك وتفوتك بلعبة مفاوضات من خلالها بتقضي عليك، انت مش شغلتك تعطيها حلول، شغلتن هني يعطوك حلول ويدبرو راسن والساحات بتوافق أو ما بتوافق هيدا قرار الناس. الحراك الماضي أستعملوا ضده هيدا الأسلوب "اعطونا مطالب وحل" وكان هيدا الشي مستحيل وفتنا بدوامة نفتش للطبقة السياسية يلي غرقتنا بأزمة نفايات على حلول للمشكلة يلي هني تسببوا فيها!! وبس انهكونا كبوا خطة شهيب وقضوا على الشارع.
ليش ما في "قيادات" ؟ ============= لسببين، الاول إنو الناس مش قاصرة ولا ناطرة مين يوجهها، المرة الماضية كان في مجموعات عم تدعي وتحرك وتصرح، وهالشي سهل كثير مهمة القضاء عليها، هلأ القرار organic بالشارع وبكل المناطق بتظاهرات لامركزية كسرت كل التابوهات بشكل جميل جداً مخوف السلطة وراعبها بشكل مخيف ما عم تعرف تتعامل معه. والتاني إنو ما حدا هلأ عندو تمثيل الشارع ولا عندو مونة عالشارع ولا أي صفة تمثيلية.
شو يلي عم يحرك الناس وكيف؟ ================== وجع الناس هوي يلي عم يحركها، في ناس من كل التوجهات بالشارع، وصحيح انو في أحزاب عم تحاول تسرق التحرك بس مش عم تنجح. اقوى نقاط القوة إنو ركب تحالف غريب عجيب جميل بين الشعب اللبناني، بين الفيراري وموتو الجوك زاوية!!! كيف؟ من يلي عملوه بالناس، كل الناس.
شو لازم يصير؟ ========== (رأيي الشخصي) لازم استمرار الزخم والضغط بالشارع ويكون النفس طويل (بالسودان والجزائر قعدوا أشهر)، ما لازم ننكسر لحد تحقيق الإنتصار، ولوقتها بيكون الشارع بلور خطة ممتازة، مش انو يبلش بدو يطرح بدائل والمشكلة بعدها بأرضها، وساعتها بتفاوض انت ومنتصر، هيدا اذا بدك تفاوض اصلاً.
حرام نلتهي بمحاولة ايجاد مخارج للسلطة، حرام نلتهي اذا بدنا نفاوض أو لأ، الشارع قدم خطوة ذهبية وسبق كل محاولات التأطير والتعليب والتشكيل، الشارع سبق السياسيين والناشطين وحتى ركاب الموجات.
هيدي لحظة مفصلية، لازم نبقى بالساحات، كل الساحات، خاصة اللامركزية بالمناطق لتصعيد الضغط.
