غندور للراعي: "ما فيك تطلب من الكون يساعدك وإنت بذات الوقت حامي زلمة الحزب ببعبدا"
شارك هذا الخبر
Saturday, February 27, 2021
كتب المحامي لؤي غندور في منشور على "فيسبوك":
"أولاً: أهمّ شي إنو بعد كلمة البطريرك بعتقد إنو ما بقى يقدر ولا زمكّ يطلع يحكي عن حقوق المسيحيين.
ثانياً: كامل التأييد للموقف "المُعلَن" بالنسبة للحياد مع إنو ما فهمت شو يعني "حياد ايجابي ناشط". بس غبطتك ما فيك تطلب من الكون يساعدك بوجه هيمنة الحزب وسلاحو وإنت بذات الوقت حامي زلمة الحزب ببعبدا اللي بيفتخر إنو وصل ببندقية الحزب. وكمان ما فيك تطلب من الشعب إنو ما يسكت عن الفساد وإنت بذات الوقت حامي رياض سلامة وعم تمنع جان قهوجي يروح عالتحقيق.
ثالثاً: عزيزي الثائر ما فيك تكون ثائر وبذات الوقت تزقّف لحدا عم يطلب من ميشال عون وسعد الحريري انو يشكلوا الحكومة لإنو إنت ع أساس ثائر ضدّن. وكمان ما فيك تكون double face ثائر وطائفي. وأهم شي إنو ما فيك تطالب بالدولة المدنية من مقرّ ديني.
ملاحظة١: عندما أسقطت الثورة حكومة الحريري في ٢٩ تشرين أصدر مجلس المطارنة بياناً بعنوان: "آن الأوان للإلتفاف حول الرئيس". لا يا حبيباتي، أنا ما نزلت عالثورة وأكلت خبيط ورصاص وغاز وتركت بيتي وتهددت كرمال إرجع إلتفّ حول الرئيس. ملاحظة٢: ما حدا يحاول يعطيني دروس بالسيادة وخصوصاً الأشخاص اللي ما بيسترجوا يحكوا بالسِّر نص ربع الحكي اللي أنا بحكيه بالعلن."
