عبير بركات لوالدها: "رح تبقى بقلبي كلّ العمر تنرجع نلتقي من جديد"

Sunday, May 24, 2020

من سنة متل اليوم فلّيت من هالدني.. فلّيت بلا ما تودّعنا.. نَطَرتني تإجي لعندك وإنقلك عالمستشفى لأنك بتعرف أني قوية بفضلك إنتَ، وكانت لحظة كتير صعبة..

بدي إعتذر منك أنو ما رح نقدر نعملك قداس نجمع فيه الأحباء هالسنة بسبب الأوضاع اللي عم نعيشا، لو بتعرف كيف تغيّرت الدني من وقتا انتقلت لليوم..

بيعجز لساني وعقلي وقلبي بس بدي عدّد صفاتك الحلوة وشو تعلّمت منك لأني محظوظة أنك "بيي".. علّمتني أنو ممنوع نستسلم، ممنوع نقول عن شي ما فينا نعملو، كلمة ضُعف ما كانت بقاموسك، ما علّمتني كيف عيش ولكن بمسار حياتك وأعمالك خلّيتني شوف شو عم تعمل وكيف بتتصرّف مع الناس، كنت مثلي الأعلى بالحياة، مصدر قوتي وثقتي بنفسي تَإقدر واجِه هالحياة بمحبة وسلام بعيداً عن الكراهية..

أخلاقك العالية علّمتني ما يكون بعيني شي بهالدني لأنو كل شي فاني، وما في شي بيحرز أنو نزعل عليه غير الإنسان، علّمتني أنو المادّة هي وسيلة لنعيش ومش هيي الهدف تنعيش كرمالا!

برحيلك خسرت كتير.. خسرت الجدار اللي بِستند عليه، خسرت منبع الحبّ، خسرت المظلة اللي بتحميني، خسرت لمسات فنية لمهندس بارع بس آثارها مترسخة بأروقة البيوت والمتاحف، خسرت إنسان بيترك بصمة وين ما تواجد، خسرت إنسان مثقف وبناقش كل اللّي بخالفو الرأي بكل ديبلوماسية واحترام..

بابا.. إنتَ أعظم شخص قابلتو بحياتي ورح تبقى بقلبي كلّ العمر تنرجع نلتقي من جديد!


"جورج عبيد"

مقالات مشابهة

الاونروا: 3 حالات ايجابية في مخيم الرشيدية من بينها موظف في الوكالة

فرقت على ثانية ابتداءً من الاثنين

رئيس بلدية المنصف جبيل : فحوصات PCR كلها سلبية

بهية الحريري تشاورت واتحاد بلديات صيدا الزهراني حول تحديات التعايش مع الفيروس

بلدية كوسبا: أحد المغتربين حجر نفسه بعدما جاءت نتيجة الـPCR ايجابية

محمد عبيد​ ضيف قناة LBCI صباح السبت