كتبت سينتيا غريب على صفحتها على فايسبوك وقالت: بتعرفو هيدي الصورة شو؟ الواحد ما بعمرو بيعمل منيح و بيخبّر.. بس اقرو و امشوا معي للأخير. من كم يوم أنا و مجوعة من ٧ أشخاص أخدنا المبادرة انو نساعد كل عيلة محتاجة بهالفترة الصعبة و كان عدد العائلات هائل مش قاطع معنا من قبل.. و كلنا منعرف انو اللبناني مشهور بعزة نفسو يمكن ما يكون عندو شي ياكلو بس ما بيخبّر... فحتى هالعيل قدرنا نوصل لمعظمها... صوّرتلكن ربع ربع ربع من الغراض يللي لا يُعدّو و لا يُحصو... إلى جانب الأشخاص الخيّرة يللي بعدن موجودين و كتار كرمال هيك منقول الدني بعدها بألف خير و في منن نسوان مدرا عامين بالدولة و بالسلطة من اول الداعمين من سنة و سنتين و بعرفن شخصيًا و ولا مرة قبلو ينذكر اسمن لان النفسية و الحياة الروحية ما خصها بالمراكز.. الى جانب هالاشخاص الخيّرة... هالعمل روحي بإمتياز... بس طلعت هالفكرة معنا بهالوقت الصعب.. قلت ما بدي اتوجّة لجهة سياسية معينة للمساعدة تا ما يتم استغلال الوضع و كرمال ما اسمع شي كلمة من الشعب🤣 فاتصلت برئيس العام للرهبنة الباسيلية الشويرية الأب شربل معلوف و قلتلو يا ابونا في عالم بطّل عندها اكل ببيتها بدنا مساعدتك.... جوابو كان هالجملة..: اكيد ح نساعد و نحنا حدكن و توكّل القيّم العام تا يجيب المواد الغذائية يللي فعلًا بيطعمو جيش و تصوّروا جاب شوكولا لان فكّر بالعيل يللي عندها ولاد... و رجعت اتصلت بالنائب البطريركي في الكويت الارشمندريت بطرس غريب و يللي الو سنين بيساعدنا.. جاوبني: ما منقبل عيلة تنام بلا اكل لو بدنا نبيع يللي نحنا منملكو... و بالفعل بفضل أبونا شربل و أبونا بطرس ح نقدر نطعمي ٤٥٠ عيلة. هني طلبو مني ما اذكر اسمن بس بعتذر اني خبّرت اللي صار..تا وصّل رسالة بتعنيلي كتير: الولاد بنفس البيت ما بيشبهو بعض.. كيف الكنيسة يللي بتحضن مجتمع كبير من مختلف العقليات و الطبقات و الجنسيات و الأفكار... بس تنتقد أبونا او مطران او الكنيسة عالعلن و عال social media ما تفكّر انو هيدي قوّة.. هيدي قمة الضعف و مش بس هيك عم بتضعف حالك و كل المجتمع المسيحي.. عندك مشكلة راجع صاحب المشكلة او المسؤول المباشر عن مسبب هالمشكلة و بس! غير هيك عم تهدم ما عم تبني! كنيستنا بحاجة النا بحاجة نكون حدها و لاء مش كلن يعني كلن مش مناح.. عنا كهنة مليانين من محبة يسوع .. و ما تنسو هوي انسان متلنا! كتار متل ابونا شربل و ابونا بطرس و قصد حبيت نزل اللي صار social media تا قلّك كنيستك حدك كنيستك هيي إمّك و إمّي و هيي نحنا
